Ganz gemäss am Motto vom Veranstauter isch ou dä Bricht uf Bärndütsch abghaute.
Am Samstig 27.6. hei mir üs mit Zug u Böss richtig Frouechappele ufgmacht. Die Reis isch leider – oder us Sicht vom Organisator zum Glück – ereignislos verlüffe.
Ds Highlight isch sicher gsi wo us der Poschi-Schoför ‚Gueti Erholig‘ gwünscht het.
Uf em Festgländ aacho hei mir bi schönstem Wätter super Alage vorgfunge wo o sehr ‚Athletefründlich‘ si gsi.
D Chugu-Stoss-Alage hei doch es nid zu übersehnigs Gfäu ufgwiese. Aber wie der Speaker eso schön het gseit: ‚Es isch für au glich‘
So isch der TVT du am Namitag o eis mit Chugustosse (Tom K, Pädu Z, Beat W u Vanessa B) ziitglich mit de Hochspringer (Küsu B, Mike B, Tom J, Nicola W) i Wettkampf gstartet.
Wie erwähnt isch d Chugustoss-Alag de Athlete sicherlich entgäge cho, das aber Tömu über 16m het gstosse, d Vanessa mit 10.00m o grad es 10i het gstosse, u am Schluss sogar es 10i aus Teamleistig het usegluegt chame bim beste Wiue nid däm minime Gfäu zurächne. Das Chugustoss-Team het e absoluti Topleistig abglieferet.
Bim Hochsprung si d Athlete nach de absolvierte Sprüng nid ganz eso ds friede gsi. Obwou sie mit 8.25 Pünkt ds Zieu vom Oberturner o hie dütlich übertroffe hei. Das zügt vo ächtem Wettkampfgeischt u Motivation!
Nach emne längere Pöiseli – wo o no Pesche Haudimaa mit emne grosse Skiusrüschtigs-Rucksack bi üs iitroffe isch – isches mit Schlöiderbau wiitergange.
Mit Küsu B, Tom K, Hausi B, Simu K, Beat W, Tom J, Tom M u Anja R isch ou hie es super Team am Start gsi. Das bimene Punktetotau vo 9.31 ou i däm Wettkampf aues sehr guet gloffe isch, isch säubsterklärend.
Ussert, das mit em Mässbang über Mässpunkt a haa. Mindestens eis Vereinsmitglied – ke Angscht René der Name wird nid verrate – het u hät da am Kampfrichter gärn gseit wär äch itz öppis fausch machi.
Wiiter isches mit Steistosse u 800m gange im dritte u letschte Wettkampfteil.
D Steistösser mit Tom K, Beat W, Pädu Z u Anja R hei e usgezeichnete Wettkampf zeigt. Nachdäm d Anja bim Schlöiderbau no knapp amne 10i verbii gschrammt isch, het sie’s när im Steistosse klar erreicht.
Da o bi de Herre der Stei sehr guet gfloge isch, hets hie es Punktetotau vo 9.52 gä.
So isch de die letschti Disziplin aagstange mit de 800m. Mike B, Janik R, Tom J u Nico W hei uf dere Wiese/Rasebahn die 2 2/3 Rundine wöue so schnäu aus müglich hinger sich bringe.
Gstartet si sie när ou sehr gut. Nach 1.5 Rundine het Nico der bis dahin füehrend Schumi überhout u isch förmlich richtig Ziu gfloge. Das ds Glöggeli ‚letschti Rundi‘ äbe ersch jetzt het glütte u är unerwarteter Wiis no e Rundi het müesse aahäiche het ne der Momänt scho echli us em Tritt bracht…, är het sich aber schnäu gfange und het das Renne när trotzdäm direkt hinger Schumi chönne beände.
Da aui Teammitglieder innerhalb es paar Sekunde iiglüffe si hets für es sensationells 10i glängt!
(Wiiter het me dank emne Teammitglied – o hie wird der Name nid verrate – jetzt e nöie Schnupfspruch: Ööh, Döö, Trua, Priis!)
So isch es cho wies het müesse cho. D Cuplimite vo 27.27Pünkt isch mit erreichte 28.20Pünkt geradezu pulversiert worde!
Das het me Du mit emne feine Hopfesaft us em Sportrucksack vo Pesche ou entsprächend gwürdiget.
Härzliche Gratulation aune Atlethe u natürlich ou Athletinne wo aues gä hei und mit dem 5.Schlussrang si belohnt worde.
Natürli nid ds vergässe sie die zauriiche Supporter wo der Verein i mängem erdänkliche Sinn unterstützt hei!
Ahh ja, es heig Du när no e Festwirtschaft u es Barzäut gä. Aber, das isch e angeri Gschicht.
Fertig!
Bricht vo Ändu „Sigi“ S