Wie immer am Bättagsamstig het geschter s Fründschaftsturne stattgfunde. Dä Alass nennt sech öpe o Schlussturne, wüu die meischte Vüreine drmit d Liechtathletiksaison beände. Das passiert nachem Motto «Zersch d Leischtig u när s Fescht». Das Jahr het dä Alass im Trueb stattgfunde. Teilgno hei d Vüreine Bärou, Langnou, Eriswiu, Truebschache u dr Vürastauter Trueb. Gstartet si Totau 53 Athlete. Dernäbe si o zaurichi Häufer u Supporter im Isatz gsi. Viele Dank Ihne aune u am durchfüerende Vürein Trueb.
Mir Schächeler si mit 11 Athlete u 5 Kampfrichter/Betreuer/Fotographe aträte. Sehr erfreulech isch gsi, dass mir e sehr e jungi Truppe am Start hei gha. Hei doch nid weniger aus 8 vo de 11 Athlete Jahrgang 2000 u jünger. Da uf dr angere Site aber zmingscht es ganzes Team (8 Athlete) us vürschiedene Grund gfäut het, het üs drfür chli d’Erfahrig gfäut.
Jede Athlet het us de Diszipline 80m, 1000m, Kugel, Hoch, Weit, Wurf und Schleuderbau e 5-Kampf chöne absolviere. Ganz nach vorne hets das Jahr niemerem vo üs glängt. Mit 96 Pünkt isch Zougg Pädu dr bescht Schächeler gsi. Härzlechi Gratulation! Erfreulech isch, dass mit Sevi u dr Nicol ir schacheinterne Wärtig när bereits zwei vor Jugi chöme.
Zum Abschluss vom Wettkampf hets die traditionelli Stafette gä. Mittlerwile hets grägnet u es isch chaut gsi. Leider hei mir üs leischtigsmässig am Wätter apasst u üser Stabwächsle hei nid wie gwünscht klappet u mir hei üs hinger ir Rangliste müesse asteue…
Nachere warme Duschi hei sech aui ufs vom TV Trueb sponserete Apéro «gstürzt». Aschliessend hets im Stärne z Nacht gä u d Rangverkündigung isch abghaute worde, bevor dr Abschluss vor Turnersaison isch gfiiret worde.
Rangliste: